نهاية العالم 2012

بسم الاب والابن والروح القدس اله واحد امين
ازيكوا ياشباب
انا جاى انهاردة ااقولكم على مفاجأة وهى ان نهاية العالم فى 2012
طبعا هتستغربوا انا بقول كده ليه ؟ و ازاى ااقول كده اصلا ؟
كان ظهر من فترة نبؤات ان نهاية العالم فى 2012 وانتشرت فيديوهات فظيعة على الموقع الشهير وهو اليوتيوب
طبعا خرج قداسة البابا يؤكد ان مافيش مخلوق فى الدنيا يقدر يحدد نهاية العالم وطبعا انا معاه وفعلا نهاية العالم ممكن مش تكون فى 2012 وممكن قبلها وممكن بعدها
بس عايز اوضحلكم حاجة مهمة
ان ربنا او الكتاب المقدس لم يذكر ملكوت السموات الا ولما يقول قدا اقترب
مش ملاحظين ان من 2000 والسيد المسيح بيقول قد اقترب منكم ملكوت السموات ؟؟
طب هو كده قريب يارب ؟؟ من2000 سنة بتقول قد اقترب
اه ده كلام صحيح وربنا مش بيضحك علينا ولما سأله تلاميذه قالهم كلمه صريحه لازم تكون مفهومة لحد الان وهى ليس لكم ان تعرفوا الازمنة والاوقات التى جعلها الاب فى سلطانه
يبقى كده نلغى نظرية ان ممكن اى مخلوق يتنبئ وان استحاله العدرا تظهر زى مابيقول البعض وتقول النهاية هتكون يوم كذا لان السيد المسيح وضح ده وقال ان الاب جعل الموضوع ده من سلطانه هو بس
طب امال ايه قد اقترب دى ؟؟
هو هنا يقصد ان كل واحد فينا نهايته تعتبر نهاية العالم بالنسباله ، لان لما يجى يموت هتكون خلصت كل فرص التوبة بالنسباله هو بس يعنى زيها زى نهاية العالم لانه برضه هتكون كل فرص التوبة خلصت للعالم كله
كمان يقصد نهاية العالم اى مجيئه الثانى لان يوم الرب كألف سنة وألف سنة كيوم
طب تعالوا نسأل نفسنا سؤال
الشهدا بتوع حادثة اسكندرية .. قعدنا نتفرج على الاكونتات بتاعتهم وكانوا بيقولوا ايه قبل الحادثة وهيعملوا ايه بكرة وبكرة ده مجاش
اللى كان بيفكر وهو مروح يشترى مثلا جمبرى ولا كابوريا كعادة رأس السنة واللى كان بيفكر يحتفل ازاى واللى كان بيفكر يفسح خطيبته ، وعند باب الكنيسة كلللللللللللللللللللل ده راااااااااح ، هل هما كانوا عاملين حساب كده ؟؟؟
عشان كده لازم نكون مستعدين وف اى وقت لان المسيح قال ان اليوم ده هيجى زى اللص واللص بيجى فى وقت مش متوقع ولو جاى فى وقت انت عارفه هتستعدله وهتقعد فى البيت وجاهز
طيب فرضا يعنى ان مجئ المسيح هيجى يوم 31 ديسمبر 2012 هتستعدله ازاى ؟؟
وهيكون ايه رد فعلك ؟؟؟
عارفين ممكن الدنيا كلها تكون مليانة بالقداسة والكل مرعووووووووب
وممكن الدنيا كلها تكون مليانة خطية ويجوا اخر شهر يتوبوا ويفتكروا انهم اخدوا كل حاجة من الدنيا وشبعوا وجايين بقى لربنا وفاكرين نفسهم ضحكوا على ربنا
مرة راهب صغير سأل معلمه الشيخ : هو انهى وقت أصلح للتوبة وتخلينى طالع على السما على طول وعايش فى الفردوس
رد الشيخ وقاله : قبل ماتموت على طول
وسأله الراهب : طب انا هموت امتى
رد الشيخ وقاله : فى اى وقت ممكن تموت
عشان كده مش نستعجب لما نلاقى حد بنحبه كان معانا الصبح وبليل بقى مع ربنا ونقعد نقول ده كان لسه معايا ، ده عمره ماراح عند دكتور
انتوا فاكرين اللى بيموتوا هما اللى بيبقى عندهم مرض خبيث وبس ، يعنى ايه مرض خبيث قدام ربنا
مليون بنى ادم بيخف من المرض الخبيث
ممكن واحد عده صداع ويموت وممكن واحد ماعندوش حاجة ويموت
مرة سمعت قصة من ابونا رافائيل عزمى ، وهى قصة رمزية
بتقول ان مرة واحد اسمه الموت واقف معاه كذا نوع من الاسهم
فسأله واحد قاله ايه الاسهم دى
رد عليه الموت وقاله : السهم ده طويل المدى عشان اجيب بيه اللى فاكر نفسه بعيد عنى وان لسه العمر بدرى
والسهم ده قصير المدى عشان اجيب بيه اللى خلاص كبر فى السن او المريض واللى بيكون معروف ان نهايته قربت
والسهم ده بيضرب عشوائى عشان اجيب اى حد فى اى وقت
عشان كده لازم تتوقع ان نهاية العالم هتبقى فى اى وقت سواء نهايتك انت او نهاية العالم الحقيقية

حبيبى
انا مش بدعوك الى التشاؤم لكن بدعوك الى الاحتراس
عيش حياتك زى ما انت عايز بس عيشها فى المسيح وساعتها بجد عمرك ماهتخاف من الموت ولا هتستنى ميعاده ولا هيشغلك كلام الناس والتنبؤات ، بل بالعكس ممكن تلاقى نفسك بتقول مع بولس الرسول لى اشتهاء ان انطلق واكون مع المسيح فذاك افضل جدا نعم افضل جدا
انت هنا على الارض بتكنز ومسيره الكنز هيضيع ويسرقه سارق
فكر تعمل كنز ليك فى السما ولما تطلع تلاقى ربنا بيقولك ياااااااااااااه انت هنا سايب رصيد كافى لخلاصك سايب صلاة واعتراف وتناول وتسبحة ووداعة وتواضع ومحبة للغير وسايب سيرة حلوة وعطرة
صدقونى طالما فينا نفس يبقى ربنا عنده امل انك هتكون احسن وعايزك انت شخصيا عشان كده سايب فيك النفس عشان تحاول وتتوب وتجيله
ياريت تكون الرسالة وصلت وخلى دايما قدامك ان نهايتك خلاص قربت وان المسيح خلاص جاى وان العدل هياخد مجراه
وصلوا لاجل ضعفى