مسرحيه رحله الى المرتفعات

: النهاردة يا أحبائي هاتسمعوا مني قصة جديدة أبطالها
هايكونوا أنت و أنت وهو وهي.
كان ياما كان في زمن من أعظم الأزمان زمن الحب
والحنان وحدة أسمها خوافة من عيلة الخوف !!!!!!!
متستغربوش هما أسمائهم كده .
المهم خوافة دي كانت بتخدم عند رئيس الرعاة لسنين
طـويلة وعايشه في كوخ ابيـض صـغير جـميل وهي
فرحانة وسـعـيدة بـس كان في حاجـتـين بيضـيـقـوها
ويخـلوها تحـس بالألم والكسـوف وهما ..... رجـلـيها
المعـوجين السود الـلي كانوا دايما يوقعوها وبقها اللي
كان منظرة وحش وكـمان كانت بـتـتـلخبط في الكلام
وفي يوم من الأيام حصـلـتلـها مشكلة كبيرة
علي طول هربت وراحت للراعي
تعالوا بيننا نعرف أيه هي المشكلة دي
الفصل الأول:
ا لمشهد الأول:
خوافة يا سيدي الراعي.............. يا سيدي الراعي .
الراعي إيه مالك يا خوافة .
خوافة إلحقنى يا سيدي ........ إلحقنى .
الراعي هدى نفسك وإحكيلى إيه اللى حصل بالضبط .
خوافة أنت عارف إن أنا ليا ابن عمتي اللى أسمه جبان .
الراعي أيوه ماله .
خوافة عمتي كئيبةعايزة تجوزنىولدهاجبان غصب عنى
أعمل إيه........وإزاى أهرب .........أنت عارف
يــا سيدي إني لو إتجوزته ها فضل عايشه معاهم
على طول .
الراعي مـتخافيش إنتى في خدمتي وإذا وثقتي فيا مش ها
يقدر يرغموكى على الزواج ...... بس ما تخليش
حد من عيله الخوف يـدخـل الكوخ بـتـاعـك عشان
هما أعدائي .
خوافة ما أنا عارفه ده يا سيدي كل عيلتي أشرار .
أه .... أه لو أقدر أهرب من الوادي إللى أنا عايشه
فيه وأطلع المرتفعات إللى هناك دي... بس إزاى
الراعي أنا كنت مستني إنك تقولى الكلام ده من زمان
عشان دى أحسن حاجه ليكي وهناك يا خوافة
هتعيشي معايا ومش ها تخافي من عيلتك تاني
لأنهم مش ها يعرفوا يوصلولك .
خوافة لكن أنا أطلع هناك وأعيش هناك ....... هاها هاها
(بسخرية من نفسها)
يا ريت أقدر..... ده أنا عرجه(تنظرلقدميهاوتبكي)
دأنا سمعت إن الطريق صعب جدا و محدش يقدر
يطلعه غير السلام والأقوياء كمان .
الراعي كلامك صح يا خوافة لكن طول ماإنتي معايا
رجليكي ها تبقي قوية و هاتوصلى للمرتفعات
وإنت عارفة إن هناك مفيش أى حد فيه عيب لأن
فيها
خوافة هتقوى رجليا ......إزاى....... طيب انت بتقول إن
مفيش حد فية عيب يقدر يدخل

الراعي كلامك صح لكن قبل ما توصلى فيه
شرطين مهمين هوإنه يكون في قلبك ورده المحبة
منفتحه وأسمك يتغير لأنه ما ينفعش لخوافة تدخـل

خوافة تفتكر ممكن فقلبي حب لكنه مش ذي الحب اللى في
قلبك يا سيدي
الراعي عشان كده ممكن تسبيني أغرس في قلبك بذره
الحب دى
خوافة ( تصرخ في ذهول ) إيه ده...دي شوكه أكيد
هاتألمنى
الراعي إذا كنت عايزه الحب لازم تدوقي الألم ومتخافيش
لأن الحب أقوي من الألم
خوافة خلاص أنا مستعده أغرسها دلوقتى
(تصرخ متوجعة من ألألم ثم تشعر بسعادة غامره)
تعبر عنها قائله:
ياه يا سيدي أنا حاسه بسعاده و فرح رغم ألألم
إللى سببتهولى
الراعي مش قلتلك ما تخافيش و دلوقتى روحي واستعدى
للرحيل لكن ما تخديش حاجه معاكى وبكره ها
قابلك عند البير .

إظلام المسرح و الإضاءة فقط على خوافة ويخرج الراعي ويغلق الستار

الراوي ومشيت خوافة وهي بتفكر في الكلام إللى قالهولها
الراعي وهي عايزه بكره يجى بسرعه وكانت
حاسة إنها فرحانة خالص لكن ما كانتش عارفه إن
عيله الخوف مش هايسبوها تهرب منهم بسهوله
وفعلا قبل ما توصل البيت لقت إللى ما كانتش
متوقعاه عارفين لقيت إيه
تعالوا بينا نشوف

جبان أهلا وسهلا يا أبله خوافة
خوافة إيه ده مين جبان ! إلحقوني ......... إلحقونى
رعب ما تخفيش يا خوافة أنا قاعد وزى ما إنتى عارفه أنا
هنا المستشار رعب مستشار العيله وكبيرها
ومحدش ها يتكلم معاكى إلا بإذنى أقعد يا جبان
وسيبها.
جبان حاضر يا أستاذ رعب
رعب خوافة ………..صحيح إللي سمعته
خوافة إللى سمعته ………..سمعت إيه
ر عب إنك عايزه تعيشى مع الراعى
خوافة مين إللي قالك الكلام ده
رعب ما علينا أنا عارف إنك بتكرهى جبان عشان كده
أنا مش هافرض عليكي إنك تتجوزيه ...........
أنادلوقتي هاسيبك عشان تفكري وتأخذى وقتك
وخليكي عارفه إن الحياه معانا فيها كل ما تشتهيه
أما مع الراعي فكلها خوف ورعب وتعب .. فكرى
وإختارى …….. يالا يا جبان تعالى .

الراوي ودخلت خوافة للبيت ومشاعرها متلخبطة بين فرح
و حزن وبين خوف من عيلتها وتمسكها بالراعي
لكن من شدة التعب غلبها النوم وهي منتظرة المعاد
إللي هتقابل فية الراعي وفي الصبح راحت عند
البير علشان تقابل الراعي
خوافة سيدي الراعي انا مستعدة علشان نبتدي الرحلة
يالا بينا
الراعي قبل ما تبتدي رحلتك يا خوافة انا هاسيب معاكي
صديقتين هايساعدوكي للوصول للمرتفعات .
خوافة لية انت مش طالع معايا .
الراعي أيوة يا خوافة ..... بس أنا مش هاسيبك ...... كل
ما تحتاجيني نادي عليا ....... والأتنين إللي معاكي
أقوياء وهايساعدوكي في رحلتك .
خوافة مين دول .
الراعي دي أشجان .......... ودي آلام .
خوافة أهلا يا أشجان ..... أهلا يا آلام . ( فترة صمت )
إية دة ياسيدي دول خرس .
الراعي لايا خوافة دول بيتكلموا لغة أنت لسة ما تعرفيهاش
خوافة أشجان ....ز آلام .... انا ناقصة ياسيدي !!!؟؟؟
كنت جبتلي فرح وسلام .
الراعي يضحك فرح وسلام متستعجليش يا خوافة أحنا
مش اتفقنا إنك تكوني واثقة فيا وللا تحبي ترجعي
وتعيشي مع عيلة الخوف .
خوافة لا يا سيدي.. انا سبتهم علشان أعيش معاك
بس ياسيدي رجليا .. إزاي هاأطلع المرتفعات .....
وأذا قابلتني صعوبات في الطريق هاأقدرأكمل ولالأ
الراعي رجليكي يا خوافة مش ها تمنعك من طلوع
المرتفعات ..لكن .. عيلتك هي إللي ها تحاربك
وإنتي في طريقك للمرتفعات ......... لكن لاتخافي
لأني معكي .

المشهد الثالث
كئيبة والله وجالك يوم يا عيلة الخوف ..... ان فية واحدة
تخرج عن طوعنا
جبان أدينا نادهنا لمستشار العيلة ونشوفة ها يعمل إيه .

يطرق الباب ويدخل م رعب وهو يقول :
رعب إيه في إيه ..... صحيح أللي سمعته ..... خوافة هربت
مع الراعي .
ندم ايوه صح يا كبير .
رعب خلاص أنت يا كبرياء تروح تجيب خوافة وتقنعها
أنها ترجع وتعيش معانا وده كله طبعا بدهائك
وكبريائك .
كبرياء حاضر يا كبيرنا أنا ها روح دلوقتي علي طول .
كئيبة تفتكر أنه يقدر يقنعها ويجيبها .
ندم متنسوش أن كبرياء قوي ووسيم وجذاب وقليلين أللي
فلتوا من تحت ايديه
كبرياء إلحقوني ..... إلحقوني الراعي بيجري ورايا .

يقفز رعب لينظر من الباب ويجري جبان ليختفي خلف أي شئ وتضع
كئيبة رأسها بين يديها
ندم أهدي .......... أهدي واحكي لنا إيه اللي حصل .
كبرياء أنا روحت عشان أجيبها ولقيتها واقفة من بعيد
رحت قربت منها .......... لقيت حاجة غريبة .

كبرياء لقيت أتنين واقفين جنبها وباين عليهم من أتباع
الراعي لكن انتهزت فرصة أن هي سايباهم ومش
ماسكة أيديهم رحت مسكت إيدها وقلتلها أنت مصدقة
ان الراعي هياخدك إنتي ويوديكي مملكة الحب ....
انت مصدقة انه بيحبك انت فعلا ..... وقلتلها أن انا
قطعت كل المسافة دي علشان أنق1ها .. وأبتديت
أشدها وأنزل بيها علي تحت ......... راحت صرخت
بصوت عالي ونادت علي الراعي وعلي طول لقيته
فجأة جنبينا كأنة كان قاعد معانا وأحنا مش شايفينه .
جبان أمم ....... لو كنت طلعت أنا كان زماني جبتها معايا .
رعب أسكت أنت لما نشوف الوقعة اللي احنا فيها دي .
جبان براحتكم انا غلطان بس في الأخر تيجو تحتاجوني
برضة .
كئيبة وإيه العمل يا مستشار العيلة .
رعب هما شفقة ومرارة فين ........ هما لسة نايمين مش
حاسين باللي بيحصل .
ندم أنا هاروح أصحيهملك دلوقتي يا عمي .
كئيبة إيه ناوي علي إية يا مستشار رعب .
رعب انا ناوي أستغل معظم أفراد العيلة .
كئيبة معظم أفراد العيلة ............ مشفاهماك .
رعب انا ناوي أطلع ندم و مرارة وشفقة وكمان كبرياء
وهاخلي كل واحد فيهم يستغل موهبته ضد خوافة
علشان يحاصروها ومتلقيش منفذ تهرب منه .
جبان الله ......... الله ياكبيرانا كنت بأقول ان مفيش غير
مستشار واحد للعيله .
رعب أقعد انت ساكت ... انت بالزات مش هاتطلع معاهم
جبان آه شفتم مش بأقولكم أن مفيش غير كبير واحد في
العيله ............... إيه بتقول إيه .
رعب اللي سمعتة
تدخل مرارة وشفقة وخلفهما ندم
شفقة إية عمنا مستشار هنا
مرارة أكيد في حاجه مش طبيعية حصلت في البيت
رعب ما طبعا إنتو لسه صاحييت وعيلة الخوف علي وشك
الأنهيار .
شفقة و مرارة إية اللي حصل
رعب هوأنا لسه احكيلكوا علي اللي حصل تبقي تحكيلكوم
ندم وانتم في الطريق .
شفقة الطريق .....طريق إيه هو إحنا رايحيين فين .
رعب رايحيين ترجعوا خوافه لأنها راحت مع الراعي
وكل واحدة فيكم لازم تستغل كل أمكانياتها ودلوقتي
يا مرارة عارفه ها تعملي إيه .
مرارة ومكنوش سموني مرارة .............. انا هاعرف
إزاي أخليها تحس بمرارة العيشة مع الراعي لغاية
لما تسيبة .
رعب وانت يا شفقة عارفة هاتعملي إيه .
شفقة عيب ياكبيرنا دا أنا تلميذتك ......... انا هاخليها
تشفق علي نفسها من تعب الطريق اللي هاتمشيه
مع الراعي .
رعب وأنت ياندم وانت ياكبرياء هاتطلعوا معاهم علشان
تحاصروها من كل حتة وكدة نشوف الراعي
ها يعمل إيه .... هاهاهاهاهاهاهاهاهاهاها.